23:01
சூதாட்ட கும்பலுக்கும் தனக்கும் தொடர்பென்ற செய்தி முட்டாள்தனமானதென இந்திய அணியின் கப்டன் ரெய்னா மறுப்புத் தெரிவித்துள்ளார். பத்தாவது உலகக் கிண்ணத் தொடர் இந்தியாவில் சமீபத்தில் நடந்தது. இத்தொடரின் போது இந்திய வீரர் ரெய்னா, ஷீரடி கோயிலுக்கு சென்றார். அப்போது சிலருடன் ரெய்னா போட்டோ எடுத்துக்கொண்டார். இதையடுத்து அந்த போட்டோவில் உள்ளவருடன் தொடர்புபடுத்தி ரெய்னாவுக்கு சூதாட்ட கும்பலுடன் தொடர்புள்ளதென சில தொலைக்காட்சி சனல்கள் செய்தி வெளியிட்டன.இந்தச் செய்திகளுக்கு தற்போதைய இந்திய அணியின் கப்டனாக உள்ள ரெய்னா கடுமையாக மறுத்துள்ளார்.
இது குறித்து அவர் கூறியதாவது; வெவ்வேறு இடங்களுக்குச் செல்லும் போது பலர் என்னுடன் இணைந்து போட்டோ எடுத்துக்கொள்ள ஆசைப்படுகின்றனர். இதுபோன்று எத்தனையோ பேர் போட்டோ எடுத்துள்ளனர். ஆனால், அவர்கள் எல்லாம் யார், யார் என்று எனக்குத் தெரியாது. நானும் யார் என்று பார்த்துக்கொண்டிருப்பதில்லை.
இந்நிலையில் எனக்கும் சூதாட்டக் கும்பலுக்கும் தொடர்பென்று செய்திகள் வெளியிடுவது முட்டாள்தனமானது. தவிர அன்றைய தினம் நான் எனது முகாமையாளருடன்தான் கோயிலுக்குச் சென்றிருந்தேனெனவும் தெரிவித்தார்.
