10:11
ஐ.பி.எல். 20 ஓவர் கிரிக்கெட் போட்டியில் ஒவ்வொரு அணியும் தலா 14 “லீக்” ஆட்டத்தில் விளையாடும் வகையில் போட்டி அட்டவணை அமைக்கப்பட்டுள்ளது. நடப்பு சாம்பியனான சென்னை சூப்பர் கிங்ஸ் அணி “பி” பிரிவில் உள்ளது. அந்த பிரிவில் கொல்கத்தா நைட் ரைடர்ஸ், கொச்சி டஸ்கர்ஸ் கேரளா, ராஜஸ்தான் ராயல்ஸ், பெங்களூர் ராயல் சேலஞ்சர்ஸ் ஆகிய 4 அணிகள் இடம் பெற்றுள்ளன.
இந்த அணிகளுடன் சென்னை தலா 2 முறை மோத வேண்டும். “ஏ” பிரிவில் உள்ள 5 அணிகளில் புனே வாரியர்சுடன் நாளை இரண்டாவது முறையாக மோதுகிறது. அந்த பிரிவில் உள்ள மற்ற அணிகளான மும்பை இந்தியன்ஸ், கிங்ஸ் லெவன் பஞ்சாப், டெல்லி டேர்டெவில்ஸ் டெக்கான் சார்ஜர்ஸ் அணியுடன் தலா ஒருமுறை மோத வேண்டும். சென்னை அணி இதுவரை 6 ஆட்டத்தில் விளையாடிவிட்டது. இதில் 3 வெற்றி, 3தோல்வியுடன் 6 புள்ளிகள் பெற்று உள்ளது. ரன்ரேட்டில் முன்னிலை வகிப்பதால் 4-வது இடத்தில் உள்ளது.
சென்னை சூப்பர் கிங்ஸ் 7-வது ஆட்டத்தில் புனே வாரியர்ஸ் அணியை நாளை (புதன்கிழமை) மீண்டும் சந்திக்கிறது. இந்த ஆட்டம் நவிமும்பையில் மாலை 4 மணிக்கு நடக்கிறது.
சென்னை சூப்பர் கிங்ஸ் சொந்த மைதானமான சேப்பாக்கத்தில் தான் 3 வெற்றியையும் பெற்றது. இதனால் வெளி மைதானத்தில் முதல் வெற்றியை பெறுமா என்று எதிர்பார்க்கப்படுகிறது.
அதே நேரத்தில் புனே வாரியர்ஸ் நேற்று நடந்த ஆட்டத்தில் தோற்றதற்கு பதிலடி கொடுக்கும் வகையில் விளையாடும். அந்த அணி தொடர்ந்து 3 தோல்வியை சந்தித்து உள்ளது. இதனால் தோல்விக்கு முற்றுப்புள்ளி வைக்கும் வகையில் விளையாடும்.
நாளை நடைபெறும் மற்றொரு ஆட்டத்தில் கொச்சி-டெக்கான் அணிகள் மோதுகின்றன. இரவு 8 மணிக்கு கொச்சியில் இந்த ஆட்டம் நடக்கிறது. கொச்சி அணி 4-வது வெற்றிக்காகவும், டெக்கான் அணி 3-வது வெற்றிக்காகவும் போராடும்.
